శ్రీ హనుమాన్ అష్టోత్తరశతనామ స్తోత్రం

హనుమానంజనాపుత్రో వాయుసూనుర్మహాబలః |
రామదూతో హరిశ్రేష్ఠః సూరీ కేసరినందనః || ౧ ||
సూర్యశ్రేష్ఠో మహాకాయో వజ్రీ వజ్రప్రహారవాన్ |
మహాసత్త్వో మహారూపో బ్రహ్మణ్యో బ్రాహ్మణప్రియః || ౨ ||
ముఖ్యప్రాణో మహాభీమః పూర్ణప్రజ్ఞో మహాగురుః |
బ్రహ్మచారీ వృక్షధరః పుణ్యః శ్రీరామకింకరః || ౩ ||
సీతాశోకవినాశీ చ సింహికాప్రాణనాశకః |
మైనాకగర్వభంగశ్చ ఛాయాగ్రహనివారకః || ౪ ||
లంకామోక్షప్రదో దేవః సీతామార్గణతత్పరః |
రామాంగుళిప్రదాతా చ సీతాహర్షవివర్ధనః || ౫ ||
మహారూపధరో దివ్యో హ్యశోకవననాశకః |
మంత్రిపుత్రహరో వీరః పంచసేనాగ్రమర్దనః || ౬ ||
దశకంఠసుతఘ్నశ్చ బ్రహ్మాస్త్రవశగోఽవ్యయః |
దశాస్యసల్లాపపరో లంకాపురవిదాహకః || ౭ ||
తీర్ణాబ్ధిః కపిరాజశ్చ కపియూథప్రరంజకః |
చూడామణిప్రదాతా చ శ్రీవశ్యః ప్రియదర్శకః || ౮ ||
కౌపీనకుండలధరః కనకాంగదభూషణః |
సర్వశాస్త్రసుసంపన్నః సర్వజ్ఞో జ్ఞానదోత్తమః || ౯ ||
ముఖ్యప్రాణో మహావేగః శబ్దశాస్త్రవిశారదః |
బుద్ధిమాన్ సర్వలోకేశః సురేశో లోకరంజకః || ౧౦ ||
లోకనాథో మహాదర్పః సర్వభూతభయాపహః |
రామవాహనరూపశ్చ సంజీవాచలభేదకః || ౧౧ ||
కపీనాం ప్రాణదాతా చ లక్ష్మణప్రాణరక్షకః |
రామపాదసమీపస్థో లోహితాస్యో మహాహనుః || ౧౨ ||
రామసందేశకర్తా చ భరతానందవర్ధనః |
రామాభిషేకలోలశ్చ రామకార్యధురంధరః || ౧౩ ||
కుంతీగర్భసముత్పన్నో భీమో భీమపరాక్రమః |
లాక్షాగృహాద్వినిర్ముక్తో హిడింబాసురమర్దనః || ౧౪ ||
ధర్మానుజః పాండుపుత్రో ధనంజయసహాయవాన్ |
బలాసురవధోద్యుక్తస్తద్గ్రామపరిరక్షకః || ౧౫ ||
భిక్షాహారరతో నిత్యం కులాలగృహమధ్యగః |
పాంచాల్యుద్వాహసంజాతసమ్మోదో బహుకాంతిమాన్ || ౧౬ ||
విరాటనగరే గూఢచరః కీచకమర్దనః |
దుర్యోధననిహంతా చ జరాసంధవిమర్దనః || ౧౭ ||
సౌగంధికాపహర్తా చ ద్రౌపదీప్రాణవల్లభః |
పూర్ణబోధో వ్యాసశిష్యో యతిరూపో మహామతిః || ౧౮ ||
దుర్వాదిగజసింహస్య తర్కశాస్త్రస్య ఖండనః |
బౌద్ధాగమవిభేత్తా చ సాంఖ్యశాస్త్రస్య దూషకః || ౧౯ ||
ద్వైతశాస్త్రప్రణేతా చ వేదవ్యాసమతానుగః |
పూర్ణానందః పూర్ణసత్వః పూర్ణవైరాగ్యసాగరః || ౨౦ ||
అష్టోత్తరశతం దివ్యం వాయుసూనోర్మహాత్మనః |
యః పఠేచ్ఛ్రద్ధయా నిత్యం సర్వబంధాత్ ప్రముచ్యతే || ౨౧ ||
ఇతి శ్రీపద్మోత్తరఖండే శ్రీ హనుమాన్ అష్టోత్తరశతనామ స్తోత్రమ్ ||