శ్రీ సరస్వతీ రహస్య స్తోత్రం

కల్యాణదాం కనకచంపకదామభూషామ్ |
వాణీం నమామి మనసా వచసా విభూత్యై || ౧ ||
యా వేదాంతార్థతత్త్వైకస్వరూపా పరమేశ్వరీ |
నామరూపాత్మనా వ్యక్తా సా మాం పాతు సరస్వతీ || ౨ ||
యా సాంగోపాంగవేదేషు చతుర్ష్వేకైవ గీయతే |
అద్వైతా బ్రహ్మణః శక్తిః సా మాం పాతు సరస్వతీ || ౩ ||
యా వర్ణపదవాక్యార్థస్వరూపేణైవ వర్తతే |
అనాదినిధనానంతా సా మాం పాతు సరస్వతీ || ౪ ||
అధ్యాత్మమధిదైవం చ దేవానాం సమ్యగీశ్వరీ |
ప్రత్యగాస్తే వదంతీ యా సా మాం పాతు సరస్వతీ || ౫ ||
అంతర్యామ్యాత్మనా విశ్వం త్రైలోక్యం యాని యచ్ఛతి |
రుద్రాదిత్యాదిరూపస్థా సా మాం పాతు సరస్వతీ || ౬ ||
యా ప్రత్యగ్దృష్టిభిర్జీవైర్వ్యజమానానుభూయతే |
వ్యాపినీ జ్ఞప్తిరూపైకా సా మాం పాతు సరస్వతీ || ౭ ||
నామజాత్యాదిభిర్భేదైరష్టధా యా వికల్పితా |
నిర్వికల్పాత్మనా వ్యక్తా సా మాం పాతు సరస్వతీ || ౮ ||
వ్యక్తావ్యక్తగిరాః సర్వే వేదాద్యా వ్యాహరంతి యామ్ |
సర్వకామదుఘా ధేనుః సా మాం పాతు సరస్వతీ || ౯ ||
యాం విదిత్వాఖిలం బంధం నిర్మథ్యాఖిలవర్త్మనా |
యోగీ యాతి పరం స్థానం సా మాం పాతు సరస్వతీ || ౧౦ ||
నామరూపాత్మకం సర్వం యస్యామావేశ్య తాం పునః |
ధ్యాయంతి బ్రహ్మరూపైకా సా మాం పాతు సరస్వతీ || ౧౧ ||
చతుర్ముఖముఖాంభోజవనహంసవధూర్మమ |
మానసే రమతాం నిత్యం సర్వశుక్లా సరస్వతీ || ౧౨ ||
నమస్తే శారదే దేవి కాశ్మీరపురవాసినీ |
త్వామహం ప్రార్థయే నిత్యం విద్యాదానం చ దేహి మే || ౧౩ ||
అక్షసూత్రాంకుశధరా పాశపుస్తకధారిణీ |
ముక్తాహారసమాయుక్తా వాచి తిష్ఠతు మే సదా || ౧౪ ||
కంబుకంఠీ సుతామ్రోష్ఠీ సర్వాభరణభూషితా |
మహాసరస్వతీ దేవీ జిహ్వాగ్రే సన్నివేశ్యతామ్ || ౧౫ ||
యా శ్రద్ధా ధారణా మేధా వాగ్దేవీ విధివల్లభా |
భక్తజిహ్వాగ్రసదనా శమాదిగుణదాయినీ || ౧౬ ||
నమామి యామినీనాథలేఖాలంకృతకుంతలామ్ |
భవానీం భవసంతాపనిర్వాపణసుధానదీమ్ || ౧౭ ||
యః కవిత్వం నిరాతంకం భుక్తిముక్తీ చ వాంఛతి |
సోఽభ్యర్చ్యైనాం దశశ్లోక్యా నిత్యం స్తౌతి సరస్వతీమ్ || ౧౮ ||
తస్యైవం స్తువతో నిత్యం సమభ్యర్చ్య సరస్వతీమ్ |
భక్తిశ్రద్ధాభియుక్తస్య షణ్మాసాత్ ప్రత్యయో భవేత్ || ౧౯ ||
తతః ప్రవర్తతే వాణీ స్వేచ్ఛయా లలితాక్షరా |
గద్యపద్యాత్మకైః శబ్దైరప్రమేయైర్విపక్షితైః || ౨౦ ||
అశ్రుతో బుధ్యతే గ్రంథః ప్రాయః సారస్వతః కవిః |
ఇత్యేవం నిశ్చయం విప్రాః సాహోవాచ సరస్వతీ || ౨౧ ||
ఇతి శ్రీ సరస్వతీ రహస్య స్తోత్రమ్ ||