శ్రీ శివ పంచాక్షర నక్షత్రమాలా స్తోత్రం

ధామలేశధూతకోకబంధవే నమః శివాయ |
పామరేతరప్రధానబంధవే నమః శివాయ || ౧ ||
శూలభిన్నదుష్టదక్షఫాల తే నమః శివాయ |
పాలయాధునా దయాలవాల తే నమః శివాయ || ౨ ||
దుష్టదైత్యవంశధూమకేతవే నమః శివాయ |
అష్టమూర్తయే వృషేంద్రకేతవే నమః శివాయ || ౩ ||
పాపహారిదివ్యసింధుమస్త తే నమః శివాయ |
శాపదోషఖండనప్రశస్త తే నమః శివాయ || ౪ ||
హేమమేదినీధరేంద్రచాప తే నమః శివాయ |
కామనైకతానహృద్దురాప తే నమః శివాయ || ౫ ||
జిహ్మగేంద్రకుండలప్రసిద్ధ తే నమః శివాయ |
జిహ్మకాలదేహదత్తపద్ధతే నమః శివాయ || ౬ ||
సామగానజాయమానశర్మణే నమః శివాయ |
సామజాసురాంగలబ్ధచర్మణే నమః శివాయ || ౭ ||
చిన్మయైకరూపదేహధారిణే నమః శివాయ |
సన్మనోగతాయ కామవైరిణే నమః శివాయ || ౮ ||
దక్షపాణిశోభికాంచనాలవే నమః శివాయ |
అక్షిఫాలవేదపూతతాలవే నమః శివాయ || ౯ ||
అక్షరాత్మనే నమద్బిడౌజసే నమః శివాయ |
ఉక్షరాజవాహ తే సతాం గతే నమః శివాయ || ౧౦ ||
రాజమాననిత్యమందహాసినే నమః శివాయ |
రాజరాజమిత్రతాప్రకాశినే నమః శివాయ || ౧౧ ||
సూనబాణదాహకృత్కృశానవే నమః శివాయ |
దానవాంధకారచండభానవే నమః శివాయ || ౧౨ ||
సర్వదేవతాగణాతిశాయినే నమః శివాయ |
సర్వమన్మనోజభంగదాయినే నమః శివాయ || ౧౩ ||
మాకరందసారవర్షిభాషిణే నమః శివాయ |
నైకజన్మపాపజాలశోషిణే నమః శివాయ || ౧౪ ||
పార్వతీప్రియాయ భక్తపాలినే నమః శివాయ |
శర్వరీశధారిణే కపాలినే నమః శివాయ || ౧౫ ||
దేహి మే వరం సితాద్రిగేహ తే నమః శివాయ |
స్వేహితప్రసన్న కామదోహ తే నమః శివాయ || ౧౬ ||
గంగయా తరంగితోత్తమాంగ తే నమః శివాయ |
అంగజారయే కరేకురంగ తే నమః శివాయ || ౧౭ ||
ఆహితాగ్నిపాలకోక్షకేతవే నమః శివాయ |
గేహదుఃఖపుంజధూమకేతవే నమః శివాయ || ౧౮ ||
దక్షసప్తతంతునాశదక్ష తే నమః శివాయ |
రక్ష మాం ప్రపన్నమాత్రరక్ష తే నమః శివాయ || ౧౯ ||
సంకటాబ్ధితీర్ణకింకరాయ తే నమః శివాయ |
పంకజాసనాయ శంకరాయ తే నమః శివాయ || ౨౦ ||
శర్మదాయ నర్యభస్మకంఠ తే నమః శివాయ |
కుర్మహే నతీర్నమద్వికుంఠ తే నమః శివాయ || ౨౧ ||
శిష్టవిప్రహృద్గుహాచరిష్ణవే నమః శివాయ |
కష్టనాశనాయ లోకజిష్ణవే నమః శివాయ || ౨౨ ||
సత్ప్రపన్నరక్షణస్వభావ తే నమః శివాయ |
విప్రడింభదర్శితార్ద్రభావ తే నమః శివాయ || ౨౩ ||
భావలభ్యతావకప్రసాద తే నమః శివాయ |
తవకాంఘ్రిభక్తదత్తమోద తే నమః శివాయ || ౨౪ ||
శక్తికల్పితప్రపంచభాగినే నమః శివాయ |
యుక్తసన్మనఃసరోజయోగినే నమః శివాయ || ౨౫ ||
శంతమాయ దంతిచర్మధారిణే నమః శివాయ |
జంతుజాతనిత్యసౌఖ్యకారిణే నమః శివాయ || ౨౬ ||
పాలినే విరించిముండమాలినే నమః శివాయ |
శీలినే నమః ప్రపుణ్యశాలినే నమః శివాయ || ౨౭ ||
శివపంచాక్షరముద్రాం చతుష్పదోల్లాసపద్యమణి ఘటితామ్ |
నక్షత్రమాలికామిహ దధదుపకంఠం నరో భవేత్సోమః || ౨౮ ||
ఇతి శ్రీమచ్ఛంకరాచార్య కృతం శ్రీ శివ పంచాక్షరనక్షత్రమాలా స్తోత్రమ్ ||