శ్రీ శబరిగిరివాస స్తోత్రం

శశిరుచిమృదుహాసం శ్యామలాంబోధభాసమ్ |
నతినుతిపరదాసం నౌమి పింఛావతంసమ్ || ౧ ||
శమధనహృదిభాంతం శత్రుపాలీకృతాంతమ్ |
కృతనుతవిపదంతం కీర్తయేఽహం నితాంతమ్ || ౨ ||
శమితసుజనతాపం శాంతిహానైర్దురాపమ్ |
కచకలితకలాపం కామయే పుష్కలాభమ్ || ౩ ||
శకలితదితిజాతం శత్రుజీమూతపాతమ్ |
భవజలనిధిపోతం భావయే నిత్యభూతమ్ || ౪ ||
శతమఖరిపుకాలం సర్వవైకుంఠబాలమ్ |
నవమయమణిమాలం నౌమి నిఃశేషమూలమ్ || ౫ ||
శఠగిరిశతధారం శష్పితేంద్రారిశూరమ్ |
నవజలదశరీరం నౌమి విశ్వైకవీరమ్ || ౬ ||
సజలజలదగాత్రం సాంద్రకారుణ్యపాత్రమ్ |
సకలవిబుధమిత్రం సన్నమామః పవిత్రమ్ || ౭ ||
ఇతి శ్రీ శబరిగిరివాస స్తోత్రమ్ ||