శ్రీ విష్ణోర్నామ స్తోత్రం (నరసింహపురాణే)

శ్రీమహాదేవ ఉవాచ |
విష్ణుర్జిష్ణుర్విభుర్దేవో యజ్ఞేశో యజ్ఞపాలకః |
ప్రభవిష్ణుర్గ్రసిష్ణుశ్చ లోకాత్మా లోకపాలకః || ౧ ||
కేశవః కేశిహా కల్పః సర్వకారణకారణమ్ |
కర్మకృద్వామనాధీశో వాసుదేవః పురుష్టుతః || ౨ ||
ఆదికర్తా వరాహశ్చ మాధవో మధుసూదనః |
నారాయణో నరో హంసో విష్ణుసేనో హుతాశనః || ౩ ||
జ్యోతిష్మాన్ ద్యుతిమాన్ శ్రీమానాయుష్మాన్ పురుషోత్తమః |
వైకుంఠః పుండరీకాక్షః కృష్ణః సూర్యః సురార్చితః || ౪ ||
నరసింహో మహాభీమో వజ్రదంష్ట్రో నఖాయుధః |
ఆదిదేవో జగత్కర్తా యోగేశో గరుడధ్వజః || ౫ ||
గోవిందో గోపతిర్గోప్తా భూపతిర్భువనేశ్వరః |
పద్మనాభో హృషీకేశో విభుర్దామోదరో హరిః || ౬ ||
త్రివిక్రమస్త్రిలోకేశో బ్రహ్మేశః ప్రీతివర్ధనః |
వామనో దుష్టదమనో గోవిందో గోపవల్లభః || ౭ ||
భక్తిప్రియోఽచ్యుతః సత్యః సత్యకీర్తిర్ధ్రువః శుచిః |
కారుణ్యః కరుణో వ్యాసః పాపహా శాంతివర్ధనః || ౮ ||
సంన్యాసీ శాస్త్రతత్త్వజ్ఞో మందారగిరికేతనః |
బదరీనిలయః శాంతస్తపస్వీ వైద్యుతప్రభః || ౯ ||
భూతావాసో గుహావాసః శ్రీనివాసః శ్రియః పతిః |
తపోవాసో దమో వాసః సత్యవాసః సనాతనః || ౧౦ ||
పురుషః పుష్కలః పుణ్యః పుష్కరాక్షో మహేశ్వరః |
పూర్ణః పూర్తిః పురాణజ్ఞః పుణ్యజ్ఞః పుణ్యవర్ధనః || ౧౧ ||
శంఖీ చక్రీ గదీ శార్ఙ్గీ లాంగలీ ముశలీ హలీ |
కిరీటీ కుండలీ హారీ మేఖలీ కవచీ ధ్వజీ || ౧౨ ||
జిష్ణుర్జేతా మహావీరః శత్రుఘ్నః శత్రుతాపనః |
శాంతః శాంతికరః శాస్తా శంకరః శంతనుస్తుతః || ౧౩ ||
సారథిః సాత్త్వికః స్వామీ సామవేదప్రియః సమః |
సావనః సాహసీ సత్త్వః సంపూర్ణాంశః సమృద్ధిమాన్ || ౧౪ ||
స్వర్గదః కామదః శ్రీదః కీర్తిదః కీర్తినాశనః |
మోక్షదః పుండరీకాక్షః క్షీరాబ్ధికృతకేతనః || ౧౫ ||
స్తుతః సురాసురైరీశ ప్రేరకః పాపనాశనః |
త్వం యజ్ఞస్త్వం వషట్కారస్త్వమోంకారస్త్వమగ్నయః || ౧౬ ||
త్వం స్వాహా త్వం స్వధా దేవ త్వం సుధా పురుషోత్తమ |
నమో దేవాదిదేవాయ విష్ణవే శాశ్వతాయ చ || ౧౭ ||
అనంతాయాప్రమేయాయ నమస్తే గరుడధ్వజ |
ఇత్యేతైర్నామభిర్దివ్యైః సంస్తుతో మధుసూదనః || ౧౮ ||
ఇతి శ్రీనరసింహపురాణే చత్వారింశోఽధ్యాయే మహాదేవకృత శ్రీ విష్ణోర్నామ స్తోత్రమ్ |