శ్రీ విష్ణు స్తవరాజః

శ్రీశుక ఉవాచ |
సంసారవృక్షమారుహ్య ద్వంద్వపాశశతైర్దృఢైః |
బధ్యమానః సుతైశ్వర్యైః పతితో యోనిసాగరే || ౧ ||
యః కామక్రోధలోభైస్తు విషయైః పరిపీడితః |
బద్ధః స్వకర్మభిర్గౌణైః పుత్రదారైషణాదిభిః || ౨ ||
స కేన నిస్తరత్యాశు దుస్తరం భవసాగరమ్ |
పృచ్ఛామ్యాఖ్యాహి మే తాత తస్య ముక్తిః కథం భవేత్ || ౩ ||
శ్రీవ్యాస ఉవాచ |
శృణు వత్స మహాప్రాజ్ఞ యజ్జ్ఞాత్వా ముక్తిమాప్నుయాత్ |
తచ్చ వక్ష్యామి తే దివ్యం నారదేన శ్రుతం పురా || ౪ ||
నరకే రౌరవే ఘోరే ధర్మజ్ఞానవివర్జితాః |
స్వకర్మభిర్మహాదుఃఖం ప్రాప్తా యత్ర యమాలయే || ౫ ||
మహాపాపకృతం ఘోరం సంప్రాప్తాః పాపకృజ్జనాః |
ఆలోక్య నారదః శీఘ్రం గత్వా యత్ర త్రిలోచనః || ౬ ||
గంగాధరం మహాదేవం శంకరం శూలపాణినమ్ |
ప్రణమ్య విధివద్దేవం నారదః పరిపృచ్ఛతి || ౭ ||
నారద ఉవాచ |
యః సంసారే మహాద్వంద్వైః కామభోగైః శుభాశుభైః |
శబ్దాదివిషయైర్బద్ధః పీడ్యమానః షడూర్మిభిః || ౮ ||
కథం ను ముచ్యతే క్షిప్రం మృత్యుసంసారసాగరాత్ |
భగవన్ బ్రూహి మే తత్త్వం శ్రోతుమిచ్ఛామి శంకర || ౯ ||
తస్య తద్వచనం శ్రుత్వా నారదస్య త్రిలోచనః |
ఉవాచ తమృషిం శంభుః ప్రసన్నవదనో హరః || ౧౦ ||
మహేశ్వర ఉవాచ |
జ్ఞానామృతం చ గుహ్యం చ రహస్యమృషిసత్తమ |
వక్ష్యామి శృణు దుఃఖఘ్నం సర్వబంధభయాపహమ్ || ౧౧ ||
తృణాది చతురాస్యాంతం భూతగ్రామం చతుర్విధమ్ |
చరాచరం జగత్సర్వం ప్రసుప్తం యస్య మాయయా || ౧౨ ||
తస్య విష్ణోః ప్రసాదేన యది కశ్చిత్ ప్రబుధ్యతే |
స నిస్తరతి సంసారం దేవానామపి దుస్తరమ్ || ౧౩ ||
భోగైశ్వర్యమదోన్మత్తస్తత్త్వజ్ఞానపరాఙ్ముఖః |
సంసారసుమహాపంకే జీర్ణా గౌరివ మజ్జతి || ౧౪ ||
యస్త్వాత్మానం నిబధ్నాతి కర్మభిః కోశకారవత్ |
తస్య ముక్తిం న పశ్యామి జన్మకోటిశతైరపి || ౧౫ ||
తస్మాన్నారద సర్వేశం దేవానాం దేవమవ్యయమ్ |
ఆరాధయేత్ సదా సమ్యగ్ధ్యాయేద్విష్ణుం సమాహితః || ౧౬ ||
యస్తం విశ్వమనాద్యంతమాద్యం స్వాత్మని సంస్థితమ్ |
సర్వజ్ఞమమలం విష్ణుం సదా ధ్యాయన్ విముచ్యతే || ౧౭ ||
నిర్వికల్పం నిరాకాశం నిష్ప్రపంచం నిరామయమ్ |
వాసుదేవమజం విష్ణుం సదా ధ్యాయన్ విముచ్యతే || ౧౮ ||
నిరంజనం పరం శాంతమచ్యుతం భూతభావనమ్ |
దేవగర్భం విభుం విష్ణుం సదా ధ్యాయన్ విముచ్యతే || ౧౯ ||
సర్వపాపవినిర్ముక్తమప్రమేయమలక్షణమ్ |
నిర్వాణమనఘం విష్ణుం సదా ధ్యాయన్ విముచ్యతే || ౨౦ ||
అమృతం పరమానందం సర్వపాపవివర్జితమ్ |
బ్రహ్మణ్యం శంకరం విష్ణుం సదా సంకీర్త్య ముచ్యతే || ౨౧ ||
యోగేశ్వరం పురాణాఖ్యమశరీరం గుహాశయమ్ |
అమాత్రమవ్యయం విష్ణుం సదా ధ్యాయన్ విముచ్యతే || ౨౨ ||
శుభాశుభవినిర్ముక్తమూర్మిషట్కపరం విభుమ్ |
అచింత్యమమలం విష్ణుం సదా ధ్యాయన్ విముచ్యతే || ౨౩ ||
సర్వద్వంద్వవినిర్ముక్తం సర్వదుఃఖవివర్జితమ్ |
అప్రతర్క్యమజం విష్ణుం సదా ధ్యాయన్ విముచ్యతే || ౨౪ ||
అనామగోత్రమద్వైతం చతుర్థం పరమం పదమ్ |
తం సర్వహృద్గతం విష్ణుం సదా ధ్యాయన్ విముచ్యతే || ౨౫ ||
అరూపం సత్యసంకల్పం శుద్ధమాకాశవత్పరమ్ |
ఏకాగ్రమనసా విష్ణుం సదా ధ్యాయన్ విముచ్యతే || ౨౬ ||
సర్వాత్మకం స్వభావస్థమాత్మచైతన్యరూపకమ్ |
శుభ్రమేకాక్షరం విష్ణుం సదా ధ్యాయన్ విముచ్యతే || ౨౭ ||
అనిర్వాచ్యమవిజ్ఞేయమక్షరాదిమసంభవమ్ |
ఏకం నూత్నం సదా విష్ణుం సదా ధ్యాయన్ విముచ్యతే || ౨౮ ||
విశ్వాద్యం విశ్వగోప్తారం విశ్వాదం సర్వకామదమ్ |
స్థానత్రయాతిగం విష్ణుం సదా ధ్యాయన్ విముచ్యతే || ౨౯ ||
సర్వదుఃఖక్షయకరం సర్వశాంతికరం హరిమ్ |
సర్వపాపహరం విష్ణుం సదా ధ్యాయన్ విముచ్యతే || ౩౦ ||
బ్రహ్మాదిదేవగంధర్వైర్మునిభిః సిద్ధచారణైః |
యోగిభిః సేవితం విష్ణుం సదా ధ్యాయన్ విముచ్యతే || ౩౧ ||
విష్ణౌ ప్రతిష్ఠితం విశ్వం విష్ణుర్విశ్వే ప్రతిష్ఠితః |
విశ్వేశ్వరమజం విష్ణుం కీర్తయన్నేవ ముచ్యతే || ౩౨ ||
సంసారబంధనాన్ముక్తిమిచ్ఛన్ కామమశేషతః |
భక్త్యైవ వరదం విష్ణుం సదా ధ్యాయన్ విముచ్యతే || ౩౩ ||
వ్యాస ఉవాచ |
నారదేన పురా పృష్ట ఏవం స వృషభధ్వజః |
యదువాచ తదా తస్మై తన్మయా కథితం తవ || ౩౪ ||
తమేవ సతతం ధ్యాహి నిర్బీజం బ్రహ్మ కేవలమ్ |
అవాప్స్యసి ధ్రువం తాత శాశ్వతం పదమవ్యయమ్ || ౩౫ ||
శ్రుత్వా సురఋషిర్విష్ణోః ప్రాధాన్యమిదమీశ్వరాత్ |
స విష్ణుం సమ్యగారాధ్య పరాం సిద్ధిమవాప్తవాన్ || ౩౬ ||
యశ్చైనం పఠతే చైవ నృసింహకృతమానసః |
శతజన్మకృతం పాపమపి తస్య ప్రణశ్యతి || ౩౭ ||
విష్ణోః స్తవమిదం పుణ్యం మహాదేవేన కీర్తితమ్ |
ప్రాతః స్నాత్వా పఠేన్నిత్యమమృతత్వం స గచ్ఛతి || ౩౮ ||
హృత్పద్మమధ్యేష్వథ కీర్తయంతి యే |
తే యాంతి సిద్ధిం పరమాం తు వైష్ణవీమ్ || ౩౯ ||
ఇతి శ్రీనరసింహపురాణే షోడశోఽధ్యాయే శ్రీ విష్ణోః స్తవరాజః ||