శ్రీ వామన స్తుతిః (బ్రహ్మ కృతం)

జయాధీశ జయాజేయ జయ విశ్వగురో హరే |
జన్మమృత్యుజరాతీత జయానంత జయాచ్యుత || ౧ ||
జయాజిత జయాశేష జయావ్యక్తస్థితే జయ |
పరమార్థార్థ సర్వజ్ఞ జ్ఞానజ్ఞేయార్థనిఃసృత || ౨ ||
జయాశేష జగత్సాక్షిన్ జగత్కర్తుర్జగద్గురో |
జగతోఽజగదంతేశ స్థితౌ పాలయతే జయ || ౩ ||
జయాఖిల జయాశేష జయ సర్వహృదిస్థిత |
జయాదిమధ్యాంతమయ సర్వజ్ఞానమయోత్తమ || ౪ ||
ముముక్షుభిరనిర్దేశ్య నిత్యహృష్ట జయేశ్వర |
యోగిభిర్ముక్తికామైస్తు దమాదిగుణభూషణ || ౫ ||
జయాతిసూక్ష్మ దుర్జ్ఞేయ జయ స్థూల జగన్మయ |
జయ సూక్ష్మాతిసూక్ష్మ త్వం జయానింద్రియ సేంద్రియ || ౬ ||
జయ స్వమాయాయోగస్థ శేషభోగ జయాక్షర |
జయైకదంష్ట్రప్రాంతేన సముద్ధృతవసుంధర || ౭ ||
నృకేసరిన్ సురారాతివక్షఃస్థలవిదారణ |
సాంప్రతం జయ విశ్వాత్మన్ మాయావామన కేశవ || ౮ ||
నిజమాయాపరిచ్ఛిన్న జగద్ధాతర్జనార్దన |
జయాచింత్య జయానేకస్వరూపైకవిధ ప్రభో || ౯ ||
వర్ధస్వ వర్ధితానేకవికారప్రకృతే హరే |
త్వయ్యేషా జగతామీశే సంస్థితా ధర్మపద్ధతిః || ౧౦ ||
న త్వామహం న చేశానో నేంద్రాద్యాస్త్రిదశా హరే |
జ్ఞాతుమీశా న మునయః సనకాద్యా న యోగినః || ౧౧ ||
త్వం మాయాపటసంవీతో జగత్యత్ర జగత్పతే |
కస్త్వాం వేత్స్యతి సర్వేశ త్వత్ప్రసాదం వినా నరః || ౧౨ ||
త్వమేవారాధితో యస్య ప్రసాదసుముఖః ప్రభో |
స ఏవ కేవలం దేవం వేత్తి త్వాం నేతరో జనః || ౧౩ ||
తదీశ్వరేశ్వరేశాన విభో వర్ధస్వ భావన |
ప్రభవాయాస్య విశ్వస్య విశ్వాత్మన్ పృథులోచన || ౧౪ ||
ఇతి శ్రీవామనపురాణే త్రింశత్తమోఽధ్యాయే బ్రహ్మ కృత శ్రీ వామన స్తోత్రమ్ |