శ్రీ లలితా చాలీసా

శ్రీ భువనేశ్వరి అవతారం జగమంతటికీ ఆధారం || ౧ ||
చండునిముండుని సంహారం చాముండేశ్వరి అవతారం || ౨ ||
హంసవాహనారూఢిణిగా వేదమాతవై వచ్చితివి || ౩ ||
భక్తిమార్గము చూపితివి జ్ఞానజ్యోతిని నింపితివి || ౪ ||
ఆదిబిక్షువై వచ్చాడు సాక్షాదాపరమేశ్వరుడు || ౫ ||
కామితార్థ ప్రదాయినిగా కంచి కామాక్షివైనావు || ౬ ||
సిరి సంపదలు ఇవ్వమ్మా శ్రీమహాలక్ష్మిగా రావమ్మా || ౭ ||
మహిషాసురుని చంపితివి ముల్లోకాలను ఏలితివి || ౮ ||
పారిజాతపు మాలలలో పార్వతి దేవిగా వచ్చితివి || ౯ ||
రక్తబీజుని హతమార్చి రమ్యకపర్దినివైనావు || ౧౦ ||
కలియుగమంతా కాపాడ కనకదుర్గవై వెలిసితివి || ౧౧ ||
రమా వాణి సేవితగా రాజరాజేశ్వరివైనావు || ౧౨ ||
శుంభ నిశుంభుల దునుమాడి వచ్చింది శ్రీశ్యామలగా || ౧౩ ||
దరిద్ర బాధలు తొలిగించి మహదానందము కలిగించే || ౧౪ ||
ఆదిశంకర పూజితవే అపర్ణాదేవి రావమ్మా || ౧౫ ||
భాగీరథుడు నిను కొలువ భూలోకానికి వచ్చితివి || ౧౬ ||
ఆదిప్రకృతి రూపిణిగా దర్శనమిచ్చెను జగదంబా || ౧౭ ||
అష్టాదశ పీఠేశ్వరిగా దర్శనమిచ్చెను జగదంబా || ౧౮ ||
లోకరక్షణ చేసావు భక్తుల మదిలో నిలిచావు || ౧౯ ||
చిరునవ్వులను చిందిస్తూ చెఱుకు గడను ధరయించితివి || ౨౦ ||
ప్రమథగణములు కొలువుండ కైలాసంబే పులకించే || ౨౧ ||
మాణిక్యాల కాంతులతో నీ పాదములు మెరిసినవి || ౨౨ ||
అంకుశాయుధ ధారిణిగా భాసిల్లెను శ్రీ జగదంబా || ౨౩ ||
శంఖనాదము చేసితివి సింహవాహినిగా వచ్చితివి || ౨౪ ||
మునులందరు నిను కొలవంగ మోక్షమార్గము చూపితివి || ౨౫ ||
చిద్రూపీ పరదేవతగా చిరునవ్వులను చిందించే || ౨౬ ||
అద్భుతమైనది నీ మహిమ అతిసుందరము నీ రూపం || ౨౭ ||
జ్ఞానప్రసూనా రావమ్మా జ్ఞానమునందరికివ్వమ్మా || ౨౮ ||
కష్టములన్నీ కడతేర్చి కనికరముతో మము కాపాడు || ౨౯ ||
అభయహస్తము చూపితివి అవతారములు దాల్చితివి || ౩౦ ||
అసురులనందరి దునుమాడి అపరాజితవై వచ్చితివి || ౩౧ ||
భూలోకానికి వచ్చితివి భక్తుల కోర్కెలు తీర్చితివి || ౩౨ ||
అందరి సేవలు అందుకొని అంతట నీవే నిండితివి || ౩౩ ||
దర్శనమియ్యగ రావమ్మా భక్తుల కష్టం తీర్చమ్మా || ౩౪ ||
మాతృహృదయవై దయచూపు కరుణామూర్తిగా కాపాడు || ౩౫ ||
మగువలమంతా చేరితిమి నీ పారాయణ చేసితిమి || ౩౬ ||
నీ నామములు ఎన్నెన్నో లెక్కించుట మా తరమవునా || ౩౭ ||
అమ్మకు నీరాజనమిచ్చి అమ్మ దీవెన పొందుదము || ౩౮ ||
సదాశివ కుటుంబినివి సౌభాగ్యమిచ్చే దేవతవు || ౩౯ ||
మహాదేవికి మనమంతా మంగళ హారతులిద్దాము || ౪౦ ||