శ్రీ రామ స్తవః (శంభు కృతం)

మాధవం ఖగగామినం జలరూపిణం పరమేశ్వరమ్ |
త్వాం భజే జగదీశ్వరం నరరూపిణం రఘునందనమ్ || ౧ ||
శ్రీహరిం త్రిగుణాత్మకం తులసీధవం మధురస్వరమ్ |
త్వాం భజే జగదీశ్వరం నరరూపిణం రఘునందనమ్ || ౨ ||
సన్నుతం బకమారకం వృకఘాతకం తురగార్దనమ్ |
త్వాం భజే జగదీశ్వరం నరరూపిణం రఘునందనమ్ || ౩ ||
సుందరం ద్విజపాలకం దితిజార్దనం దనుజార్దనమ్ |
త్వాం భజే జగదీశ్వరం నరరూపిణం రఘునందనమ్ || ౪ ||
సరయూనతం ప్రియపుష్పకం ప్రియభూసురం లవబాలకమ్ |
త్వాం భజే జగదీశ్వరం నరరూపిణం రఘునందనమ్ || ౫ ||
భక్తపం జనతోషదం సురపూజితం శ్రుతిభిః స్తుతమ్ |
త్వాం భజే జగదీశ్వరం నరరూపిణం రఘునందనమ్ || ౬ ||
శ్రీధరం ధృతిదాయకం బలవర్ధనం గతిదాయకమ్ |
త్వాం భజే జగదీశ్వరం నరరూపిణం రఘునందనమ్ || ౭ ||
శ్యామలం రవిభాసురం శశిసౌఖ్యదం కరుణార్ణవమ్ |
త్వాం భజే జగదీశ్వరం నరరూపిణం రఘునందనమ్ || ౮ ||
అచ్యుతం పురుషోత్తమం పరమేష్ఠినం స్మితభాషిణమ్ |
త్వాం భజే జగదీశ్వరం నరరూపిణం రఘునందనమ్ || ౯ ||
యః పఠేద్భువి మానవస్తవ భక్తిమాంస్తపనోదయే |
సోఽస్తు తే పదసేవనే బహుతత్పరో మమ వాక్యతః || ౧౦ ||
ఇతి శ్రీశంభు కృత శ్రీరామ స్తవః |