శ్రీ రాఘవేంద్ర హృదయం

నారాయణం మహాలక్ష్మీం భార్గవం రఘునాయకమ్ |
కృష్ణం వ్యాసం హనూమంతం భీమం మధ్వం గురూనపి || ౧ ||
వ్యాసం నత్వాఽవధూతోఽహం వక్ష్యామి హృదయం గురోః |
నానాఛందః సుసర్వార్థదాయకం పాపనాశకమ్ || ౨ ||
భూలోకేఽస్మిన్ సర్వసౌభాగ్యహేతుమ్ |
చిత్తే నిత్యం సంవసత్విష్టదైవమ్ || ౩ ||
పురా ప్రహ్లాదనామాఽభూత్ హిరణ్యకశిపోః సుతః |
యదర్థం శ్రీమహావిష్ణుర్నృకంఠీరవతాం గతః || ౪ ||
సంహతః ప్రహతశ్చేతి తస్యాస్తాం పరిచారిణౌ |
త్రేతాయాం రామసేవార్థం విభీషణతయాఽజని || ౫ ||
తత్రాపి చారౌ తౌ జాతౌ సంధికశ్చ ప్రసంధికః |
ద్వాపరేఽపి సమం తాభ్యాం సమావిష్టశ్చ వాయునా || ౬ ||
భూభారక్షపణే విష్ణోరంగతామాప్తుమేవ సః |
ప్రతీపపుత్రతామాప్య బాహ్లీకేష్వభవత్పతిః || ౭ ||
కలౌ గోపాలకృష్ణార్చా పూజాయై వ్యాసమస్కరీ |
భూత్వా నిర్జిత్య దుర్వాదాన్ మధ్వశాస్త్రం ప్రకాశయత్ || ౮ ||
బ్రహ్మమానసపూజాయామావిర్భూతాం హృదంబుజాత్ |
శ్రీరామార్యం చ సీతార్చాం ప్రపూజయిషురేషకః || ౯ ||
శ్రీరాఘవేంద్రతీర్థాఖ్యోఽవతీర్య యతిరూపతః |
వివృత్యా మధ్వశాస్త్రస్య లోకోపకృతిమాతనోత్ || ౧౦ ||
అప్పణ్ణాచార్య కృష్ణాఖ్యౌ తత్రాపి ద్విజరూపతః |
సంహతప్రహతౌ జాతౌ శిష్యౌ తస్య ప్రియౌ సదా || ౧౧ ||
పునశ్చ సత్యసంధాఖ్యో మఠాంతరనివాసినీమ్ |
అనర్చితాం చ సీతాయాః ప్రతిమామార్చయద్యతిః || ౧౨ ||
విష్వక్సేనాహీశపుత్రావతారాః షడిమే మతాః |
తస్య శ్రీరాఘవేంద్రగురోః కామ్యార్థదాయినః || ౧౩ ||
అప్పణ్ణాచార్యరచితం స్తోత్రం సర్వేష్టసాధకమ్ |
ఏతద్వినా గురోః పూజా స్తోత్రం చాష్టాక్షరీ జపః || ౧౪ ||
సేవా చ వ్యర్థతామేతి న ప్రసాదో గురోర్భవేత్ |
ఆదౌ సకృద్వా తత్పాఠాదన్యత్సిద్ధ్యతి శీఘ్రతః || ౧౫ ||
సర్వేష్వపి చ శిష్యేషు అప్పణ్ణాచార్య ఏవ సః |
గురోరతిప్రియో యస్మాత్ స్తుతిస్తేన సమాదృతాః || ౧౬ ||
అప్పణ్ణాచార్య సంప్రోక్తం మూలం మాలా చ వర్మ చ |
యథాయోగం యథాకాలం తత్తదుక్తార్థసిద్ధిదమ్ || ౧౭ ||
శ్రీరాఘవేంద్రయతినం ఈప్సితార్థప్రదాయినమ్ |
ఉపాసతే యథా భక్త్యా తథా ఫలమవాప్నుయాత్ || ౧౮ ||
సేవయా పరమహంసానామైహికాఽముష్మికం భవేత్ |
జ్ఞానం భక్తిం చ వైరాగ్యం భుక్తిం ముక్తిం చ విందతి || ౧౯ ||
ఇత్యాది వాక్యాత్ పరమహంసాధీశమిమం గురుమ్ |
సేవేత సర్వథా మర్త్యః స్వరూపోద్ధారకారణమ్ |
స్తువీత బహుభిః స్తోత్రైః ప్రార్థయీత యథేప్సితమ్ || ౨౦ ||
సీతారఘూత్తంసపదాబ్జచిత్తమ్ |
కామ్యార్థదాతారమతీతదోషమ్ || ౨౧ ||
జయతు జయతు రమ్యే రంజితానేకలోకః |
జయతు జయతు భూమా భూరి భూరి ప్రదాతా || ౨౨ ||
జయతు జయతు మిత్రం మీలితానేకవైరీ |
జయతు జయతు తాతస్తాపహర్తా నితాంతమ్ || ౨౩ ||
మహాజనపరంపరాభజనగోచరం భూతిదమ్ |
సుఖప్రదమహర్నిశం సుఖసుఖేన సంసిద్ధిదమ్ || ౨౪ ||
త్వదీక్షణవిధౌ దృశా భవతు తేఽర్చనాయాం కరౌ |
ప్రదక్షిణవిధౌ పదే గురువరాశ్రయే తే పదే || ౨౫ ||
ఆత్తాధిరస్మ్యహమనుత్తానలుంఠదపచిత్తావివేకమతిమాన్ |
శ్రీరాఘవేంద్ర దయయాఽఽరాదుపైహి మమ ధీరాశు యచ్ఛ సుమతిమ్ || ౨౬ ||
తవ సేవారతాన్ కాంశ్చిత్ భక్తాన్ ప్రేషయ మాం ప్రతి |
తేషాం మనోరథం తాత మయా పుత్రేణ పూరయ || ౨౭ ||
అథవా కరుణాసింధో మయి సన్నిహితః సదా |
పుత్రస్య మమ వాక్యేన సర్వసర్వేష్టదో భవ || ౨౮ ||
యేన కేనాప్యుపాయేన దూనే దుర్యశసా భువి |
మాహాత్మ్యం మయి విన్యస్య కురు మాం లోకపూజితమ్ || ౨౯ ||
యుక్తాయుక్తమజానానో యాచే త్వాం బాలవద్గురో |
దాతా త్రాతా దయాలుస్త్వం యథేచ్ఛసి తథా కురు || ౩౦ ||
సర్వజ్ఞాయ స్వతంత్రాయ భక్తక్లేశవినాశినే |
ఉదారచేతసే కిం తే వదే మద్భారవాహినే || ౩౧ ||
ఆపాదమౌళిపర్యంతం గురూణామాకృతిం స్మరేత్ |
తేన విఘ్నాః ప్రణశ్యంతి సిద్ధ్యంతి చ మనోరథాః || ౩౨ ||
ఇతి శ్రీగురురాజస్య హృదయం తదనుజ్ఞయా |
కృష్ణావధూత కథితం గురువాక్యానుసారతః |
సంపాద్య సిద్ధసంకల్పే భక్తిం ముక్తిం చ విందతి || ౩౩ ||
పఠనాచ్ఛ్రవణాద్వాపి గురుసాన్నిధ్యకారణమ్ |
కిమత్రబహునా సర్వం గురురాజప్రసాదతః || ౩౪ ||
దీనానాం శరణముదారచిత్తవృత్తిః |
సుప్రేమ్ణా మయి మమ తాత సన్నిధేహి || ౩౫ ||
ఇతి శ్రీకృష్ణావధూతపండిత కృతౌ శ్రీరాఘవేంద్రతంత్రే శ్రీ రాఘవేంద్ర హృదయం నామ తృతీయః పటలః ||