శ్రీ రాఘవేంద్ర రక్షా స్తోత్రం

శ్రీరాఘవేంద్రనామ్నైవ స్వాంగన్యాసం తు కారయేత్ |
తేనైవ ధార్ఢ్యం దేహస్య భవత్యేవ న సంశయః || ౧ ||
రాఘవేంద్రః శిరః పాతు ఫాలం పాతు యతీశ్వరః |
శ్రోత్రే పాతు సురశ్రేష్ఠో ముఖం పాతు మహాయశాః || ౨ ||
నేత్రే పాతు గురుశ్రేష్ఠో ఘ్రాణం పాతు మహామనాః |
గండే పాతు గుణాంభోధిః కపోలే కామితప్రదః || ౩ ||
ఊర్ధ్వోష్ఠం విబుధః పాతు హ్యధరోష్ఠం హరిప్రియః |
దంతాలిం దేశికః పాతు జిహ్వాం పాతు జగద్గురుః || ౪ ||
చుబుకం చతురః పాతు కంఠం పాతు యతీశ్వరః |
స్కంధే పాతు సురశ్రేష్ఠో భుజౌ చ సురవందితః || ౫ ||
బాహూ పాతు మహాప్రాజ్ఞో హస్తౌ సర్వజ్ఞసత్తమః |
హృదయం హరిభక్తస్తు కక్షౌ పాతు విచక్షణః || ౬ ||
కుక్షిం చ పాతు ప్రహ్లాదో నాభిం పాతు నరాంశకః |
కటిం సుధీంద్రతనయో జఘనం వ్యాసమూర్తిమాన్ || ౭ ||
పృష్ఠం కృష్ణప్రియః పాతు గుహ్యం గురువరః సదా |
మేఢ్రం పాతు మహాధీరో వృషణౌ ధీమతాం వరః || ౮ ||
ఊరూ పాతు మహోదారః జానునీ జయతాం వరః |
జంఘే జితేంద్రియః పాతు గుల్ఫౌ కారుణ్యసాగరః || ౯ ||
పాదౌ పాపహరః పాతు అంగులీ పాతు భూతిదః |
సర్వాంగం సార్వభౌమస్తు పాయాన్మాం పాపినాం సదా || ౧౦ ||
ఏవమేతద్గురోర్నామ్నా సర్వాంగం రక్షయేత్సుధీః |
తస్య రోగా వినశ్యంతి సంచితా అపి నిత్యశః || ౧౧ ||
ఆగామినో రోగసంఘాః నైవాయాంతి కదాచన |
నశ్యేయుః సర్వపాపాని సర్వేష్టాని భవంతి చ || ౧౨ ||
ఇతి శ్రీరాఘవేంద్రార్యపదపంకజసేవినా |
స్వామినా రచితం రక్షాస్తోత్రం సర్వార్థసిద్ధిదమ్ || ౧౩ ||
ఇతి శ్రీగురుజగన్నాథదాసార్య విరచితం శ్రీ రాఘవేంద్ర రక్షా స్తోత్రమ్ ||