శ్రీ మహాకాలభైరవ కవచం

శ్రీదేవ్యువాచ |
దేవదేవ మహాబాహో భక్తానాం సుఖవర్ధన |
కేన సిద్ధిం దదాత్యాశు కాళీ త్రైలోక్యమోహన || ౧ ||
తన్మే వద దయాఽఽధార సాధకాభీష్టసిద్ధయే |
కృపాం కురు జగన్నాథ వద వేదవిదాం వర || ౨ ||
శ్రీభైరవ ఉవాచ |
గోపనీయం ప్రయత్నేన తత్త్వాత్ తత్త్వం పరాత్పరమ్ |
ఏష సిద్ధికరః సమ్యక్ కిమథో కథయామ్యహమ్ || ౩ ||
మహాకాలమహం వందే సర్వసిద్ధిప్రదాయకమ్ |
దేవదానవగంధర్వకిన్నరపరిసేవితమ్ || ౪ ||
కవచం తత్త్వదేవస్య పఠనాద్ఘోరదర్శనే |
సత్యం భవతి సాన్నిధ్యం కవచస్తవనాంతరాత్ || ౫ ||
సిద్ధిం దదాతి సా తుష్టా కృత్వా కవచముత్తమమ్ |
సామ్రాజ్యత్వం ప్రియం దత్త్వా పుత్రవత్ పరిపాలయేత్ || ౬ ||
కవచస్య ఋషిర్దేవీ కాళికా దక్షిణా తథా |
విరాట్ఛందః సువిజ్ఞేయం మహాకాలస్తు దేవతా |
కాళికా సాధనే చైవ వినియోగః ప్రకీర్తితః || ౭ ||
శ్మశానస్థో మహారుద్రో మహాకాలో దిగంబరః |
కపాలకర్తృకా వామే శూలం ఖట్వాంగం దక్షిణే || ౮ ||
భుజంగభూషితే దేవి భస్మాస్థిమణిమండితః |
జ్వలత్పావకమధ్యస్థో భస్మశయ్యావ్యవస్థితః || ౯ ||
విపరీతరతాం తత్ర కాళికాం హృదయోపరి |
పేయం ఖాద్యం చ చోష్యం చ తౌ కృత్వా తు పరస్పరమ్ |
ఏవం భక్త్యా యజేద్దేవం సర్వసిద్ధిః ప్రజాయతే || ౧౦ ||
ప్రణవం పూర్వముచ్చార్య మహాకాలాయ తత్పదమ్ |
నమః పాతు మహామంత్రః సర్వశాస్త్రార్థపారగః || ౧౧ ||
అష్టాక్షరో మహామంత్రః సర్వాశాపరిపూరకః |
సర్వపాపక్షయం యాతి గ్రహణే భక్తవత్సలే || ౧౨ ||
కూర్చద్వంద్వం మహాకాల ప్రసీదేతి పదద్వయమ్ |
లజ్జాయుగ్మం వహ్నిజాయా స తు రాజేశ్వరో మహాన్ || ౧౩ ||
మంత్రగ్రహణమాత్రేణ భవేత్ సత్యం మహాకవిః |
గద్యపద్యమయీ వాణీ గంగానిర్ఝరితా తథా || ౧౪ ||
తస్య నామ తు దేవేశి దేవా గాయంతి భావుకాః |
శక్తిబీజద్వయం దత్వా కూర్చం స్యాత్ తదనంతరమ్ || ౧౫ ||
మహాకాలపదం దత్వా మాయాబీజయుగం తథా |
కూర్చమేకం సముద్ధృత్య మహామంత్రో దశాక్షరః || ౧౬ ||
రాజస్థానే దుర్గమే చ పాతు మాం సర్వతో ముదా |
వేదాదిబీజమాదాయ భగమాన్ తదనంతరమ్ || ౧౭ ||
మహాకాలాయ సంప్రోచ్య కూర్చం దత్వా చ ఠద్వయమ్ |
హ్రీంకారపూర్వముద్ధృత్య వేదాదిస్తదనంతరమ్ || ౧౮ ||
మహాకాలస్యాంతభాగే స్వాహాంతమనుముత్తమమ్ |
ధనం పుత్రం సదా పాతు బంధుదారానికేతనమ్ || ౧౯ ||
పింగళాక్షో మంజుయుద్ధే యుద్ధే నిత్యం జయప్రదః |
సంభావ్యః సర్వదుష్టఘ్నః పాతు స్వస్థానవల్లభః || ౨౦ ||
ఇతి తే కథితం తుభ్యం దేవానామపి దుర్లభమ్ |
అనేన పఠనాద్దేవి విఘ్ననాశో యథా భవేత్ || ౨౧ ||
సంపూజకః శుచిస్నాతః భక్తియుక్తః సమాహితః |
సర్వవ్యాధివినిర్ముక్తః వైరిమధ్యే విశేషతః || ౨౨ ||
మహాభీమః సదా పాతు సర్వస్థానేషు వల్లభమ్ |
కాళీపార్శ్వస్థితో దేవః సర్వదా పాతు మే ముఖే || ౨౩ ||
పఠనాత్ కాళికాదేవీ పఠేత్ కవచముత్తమమ్ |
శ్రుణుయాద్వా ప్రయత్నేన సదాఽఽనందమయో భవేత్ || ౧ ||
శ్రద్ధయాఽశ్రద్ధయా వాపి పఠనాత్ కవచస్య యత్ |
సర్వసిద్ధిమవాప్నోతి యద్యన్మనసి వర్తతే || ౨ ||
బిల్వమూలే పఠేద్యస్తు పఠనాత్కవచస్య యత్ |
త్రిసంధ్యం పఠనాద్దేవి భవేన్నిత్యం మహాకవిః || ౩ ||
కుమారీం పూజయిత్వా తు యః పఠేద్భావతత్పరః |
న కించిద్దుర్లభం తస్య దివి వా భువి మోదతే || ౪ ||
దుర్భిక్షే రాజపీడాయాం గ్రామే వా వైరిమధ్యకే |
యత్ర యత్ర భయం ప్రాప్తః సర్వత్ర ప్రపఠేన్నరః || ౫ ||
తత్ర తత్రాభయం తస్య భవత్యేవ న సంశయః |
వామపార్శ్వే సమానీయ శోభితాం వరకామినీమ్ || ౬ ||
శ్రద్ధయాఽశ్రద్ధయా వాపి పఠనాత్ కవచస్య తు |
ప్రయత్నతః పఠేద్యస్తు తస్య సిద్ధిః కరే స్థితా || ౭ ||
ఇదం కవచమజ్ఞాత్వా కాలం యో భజతే నరః |
నైవ సిద్ధిర్భవేత్తస్య విఘ్నస్తస్య పదే పదే |
ఆదౌ వర్మ పఠిత్వా తు తస్య సిద్ధిర్భవిష్యతి || ౮ ||
ఇతి రుద్రయామలే మహాతంత్రే శ్రీ మహాకాలభైరవ కవచమ్ ||