శ్రీ భైరవ తాండవ స్తోత్రం

లోకం సుఖయంతం విలసితవంతం ప్రకటితదంతం నృత్యకరమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౧ ||
కింకిణిగణరావం త్రిభువనపావం ఖర్పరసావం పుణ్యభరమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౨ ||
కలుషం శమయంతం పరిభృతసంతం మత్తదృగంతం శుద్ధతరమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౩ ||
వృతభూతపిశాచం స్ఫుటమృదువాచం స్నిగ్ధసుకాచం భక్తభరమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౪ ||
సుఖితాఖిలలోకం పరిగతశోకం శుద్ధవిలోకం పుష్టికరమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౫ ||
శరణాగతపాలం మృగమదభాలం సంజితకాలం స్వేష్టబలమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౬ ||
రక్తాంశుకజోషం పరికృతతోషం నాశితదోషం సన్మతిదమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౭ ||
బహుమద్యపనాథం గీతసుగాథం కష్టసునాథం వీరేశమ్ |
భజ భజ భూతేశం ప్రకటమహేశం భైరవవేషం కష్టహరమ్ || ౮ ||
ఇతి శ్రీ భైరవ తాండవ స్తోత్రమ్ ||