శ్రీ బద్రీనాథాష్టకం

భూవైకుంఠకృతావాసం దేవదేవం జగత్పతిమ్ |
చతుర్వర్గప్రదాతారం శ్రీబద్రీశం నమామ్యహమ్ || ౧ ||
తాపత్రయహరం సాక్షాచ్ఛాంతిపుష్టిబలప్రదమ్ |
పరమానందదాతారం శ్రీబద్రీశం నమామ్యహమ్ || ౨ ||
సద్యః పాపక్షయకరం సద్యః కైవల్యదాయకమ్ |
లోకత్రయవిధాతారం శ్రీబద్రీశం నమామ్యహమ్ || ౩ ||
భక్తవాంఛాకల్పతరుం కరుణారసవిగ్రహమ్ |
భవాబ్ధిపారకర్తారం శ్రీబద్రీశం నమామ్యహమ్ || ౪ ||
సర్వదేవనుతం శశ్వత్ సర్వతీర్థాస్పదం విభుమ్ |
లీలయోపాత్తవపుషం శ్రీబద్రీశం నమామ్యహమ్ || ౫ ||
అనాదినిధనం కాలకాలం భీమయమచ్యుతమ్ |
సర్వాశ్చర్యమయం దేవం శ్రీబద్రీశం నమామ్యహమ్ || ౬ ||
గంధమాదనకూటస్థం నరనారాయణాత్మకమ్ |
బదరీఖండమధ్యస్థం శ్రీబద్రీశం నమామ్యహమ్ || ౭ ||
శత్రూదాసీనమిత్రాణాం సర్వజ్ఞం సమదర్శినమ్ |
బ్రహ్మానందచిదాభాసం శ్రీబద్రీశం నమామ్యహమ్ || ౮ ||
శ్రీబద్రీశాష్టకమిదం యః పఠేత్ ప్రయతః శుచిః |
సర్వపాపవినిర్ముక్తః స శాంతిం లభతే పరామ్ || ౯ ||
ఇతి శ్రీ బద్రీనాథాష్టకమ్ ||