శ్రీ పరశురామ స్తోత్రం

కరాభ్యాం పరశుం చాపం దధానం రేణుకాత్మజమ్ |
జామదగ్న్యం భజే రామం భార్గవం క్షత్రియాంతకమ్ || ౧ ||
నమామి భార్గవం రామం రేణుకాచిత్తనందనమ్ |
మోచితాంబార్తిముత్పాతనాశనం క్షత్రనాశనమ్ || ౨ ||
భయార్తస్వజనత్రాణతత్పరం ధర్మతత్పరమ్ |
గతగర్వప్రియం శూరం జమదగ్నిసుతం మతమ్ || ౩ ||
వశీకృతమహాదేవం దృప్తభూపకులాంతకమ్ |
తేజస్వినం కార్తవీర్యనాశనం భవనాశనమ్ || ౪ ||
పరశుం దక్షిణే హస్తే వామే చ దధతం ధనుః |
రమ్యం భృగుకులోత్తంసం ఘనశ్యామం మనోహరమ్ || ౫ ||
శుద్ధం బుద్ధం మహాప్రజ్ఞామండితం రణపండితమ్ |
రామం శ్రీదత్తకరుణాభాజనం విప్రరంజనమ్ || ౬ ||
మార్గణాశోషితాబ్ధ్యంశం పావనం చిరజీవినమ్ |
య ఏతాని జపేద్రామనామాని స కృతీ భవేత్ || ౭ ||
ఇతి శ్రీవాసుదేవానందసరస్వతీ విరచితం శ్రీ పరశురామ స్తోత్రమ్ |