శ్రీ చంద్రమౌళీశ్వర స్తవః

యస్మిన్ జగత్సర్వమిదం విభాతి
యశ్చాప్యనన్యః సకలప్రపంచాత్ |
తిలేషు తైలోపమమాస్థితం త్వాం
శ్రీచంద్రమౌళీశ్వరమాశ్రయామః || ౧ ||
పశ్యంతి యన్న శ్రుతయః శిరస్థం
శిరఃస్థితం వస్త్వివ సర్వలోకాః |
త్వామాత్మభూతం జగతాం త్రయాణాం
శ్రీచంద్రమౌళీశ్వరమాశ్రయామః || ౨ ||
అణోరణీయాన్ మహతో మహీయా-
-నాత్మా గుహాయాం నిహితోఽస్య జంతోః |
త్వం సర్వభూతస్థితమాత్మరూపం
శ్రీచంద్రమౌళీశ్వరమాశ్రయామః || ౩ ||
యః సర్వసాక్షీ తమసః పరస్తా-
-ద్విభాతి సర్వం కిల యస్య భాసా |
త్వామాగమాంతైరపి దుర్నిరూపం
శ్రీచంద్రమౌళీశ్వరమాశ్రయామః || ౪ ||
పుమానవిజ్ఞాయ శివం కదాచి-
-ద్దుఃఖస్య నాంతం సముపైతి ధీరః |
త్వాం సచ్చిదానందమయం ప్రశాంతం
శ్రీచంద్రమౌళీశ్వరమాశ్రయామః || ౫ ||
అజం పురాణం పురుషం మహాంతం
అనశ్వరం వాఙ్మనసాఽతి దూరమ్ |
జ్ఞానాత్మనాం హృద్యవభాసమానం
శ్రీచంద్రమౌళీశ్వరమాశ్రయామః || ౬ ||
వదంత్యమీ యత్పదమేవ వేదా
జ్ఞాతే తు యాస్మిన్ సకలం విబుద్ధమ్ |
త్వాం ప్రత్యగాత్మనమచింత్యశక్తిం
శ్రీచంద్రమౌళీశ్వరమాశ్రయామః || ౭ ||
యం నిర్వికల్పేన సమాధినైవ
తపస్వినశ్చేతసి వీతరాగాః |
ధ్యాయంతి తేజోమయమద్భుతం త్వాం
శ్రీచంద్రమౌళీశ్వరమాశ్రయామః || ౮ ||
త్రిలోచనం చంద్రకలావతంసం
గంగాతరంగోల్లసదుత్తమాంగమ్ |
స్మేరాస్యమిష్టప్రదమష్టమూర్తిం
శ్రీచంద్రమౌళీశ్వరమాశ్రయామః || ౯ ||
అపారసచ్చిత్సుఖరాశిమేక-
-మనాదిమధ్యాంతమనంతరూపమ్ |
త్రిలోచనం నీలగలం ప్రశాంతం
శ్రీచంద్రమౌళీశ్వరమాశ్రయామః || ౧౦ ||
కైలాసశైలేంద్రశిరస్తటేషు
నగేంద్రపుత్ర్యా సహ సంవసంతమ్ |
విభూతి రుద్రాక్షవిభూషితాంగం
శ్రీచంద్రమౌళీశ్వరమాశ్రయామః || ౧౧ ||
ఇతి శివరహస్యాంతర్గతే గణైః కృత శ్రీ చంద్రమౌళీశ్వర స్తుతిః ||