శ్రీ గంగా స్తవః

శృణుధ్వం మునయః సర్వే గంగాస్తవమనుత్తమమ్ |
శోకమోహహరం పుంసామృషిభిః పరికీర్తితమ్ || ౧ ||
స్తుతా హరిపదాంబుజాదుపగతా జగత్సంసదః |
ప్రసన్నవదనా శుభా భవభయస్య విద్రావిణీ || ౨ ||
మహేశముకుటప్రభా గిరిశిరఃపతాకా సితా |
విముక్తిఫలశాలినీ కలుషనాశినీ రాజతే || ౩ ||
శ్రుతిస్మృతిగణస్తుతద్విజకులాలవాలావృతా |
సుధర్మఫలశాలినీ సుఖపలాశినీ రాజతే || ౪ ||
మునీంద్రవరనందినీ దివి మతా చ మందాకినీ |
ప్రణామగుణకీర్తనాదిషు జగత్సు సంరాజతే || ౫ ||
సఫేనజలహాసినీ సితమరాలసంచారిణీ |
రసోల్లసితగామినీ జలధికామినీ రాజతే || ౬ ||
క్వచిత్కలకలస్వనా క్వచిదధీరయాదోగణా |
క్వచిజ్జనవిగాహితా జయతి భీష్మమాతా సతీ || ౭ ||
స ఏవ తపసాం నిధిర్జపతి జాహ్నవీమాదరాత్ |
స ఏవ విజయీ ప్రభుః సురతరంగిణీం సేవతే || ౮ ||
చలల్లహరిలోలితం రుచిరతీరజంభాలితమ్ |
త్రిపథగామిని ప్రియమతీవ పశ్యామ్యహో || ౯ ||
త్వన్నామస్మరణం తవోదయకథాసంలాపనం పావనమ్ |
స్తుత్వా చోద్గతపాతకో భువి కదా శాంతశ్చరిష్యామ్యహమ్ || ౧౦ ||
ఇత్యేతదృషిభిః ప్రోక్తం గంగాస్తవనముత్తమమ్ |
స్వర్గ్యం యశస్యమాయుష్యం పఠనాచ్ఛ్రవణాదపి || ౧౧ ||
సర్వపాపహరం పుంసాం బలమాయుర్వివర్ధనమ్ |
ప్రాతర్మధ్యాహ్నసాయాహ్నే గంగాసాన్నిధ్యతా భవేత్ || ౧౨ ||
ఇత్యేతద్భార్గవాఖ్యానం శుకదేవాన్మయా శ్రుతమ్ |
పఠితం శ్రావితం చాత్ర పుణ్యం ధన్యం యశస్కరమ్ || ౧౩ ||
అవతారం మహావిష్ణోః కల్కేః పరమమద్భుతమ్ |
పఠతాం శృణ్వతాం భక్త్యా సర్వాశుభవినాశనమ్ || ౧౪ ||
ఇతి శ్రీకల్కిపురాణే గంగాస్తవః ||