శ్రీ కాళీ స్తవనం (శాకినీ స్తోత్రం)

శ్రీఆనందభైరవీ ఉవాచ |
మహాకాల శివానంద పరమానంద నిర్భర |
త్రైలోక్యసిద్ధిద ప్రాణవల్లభ శ్రూయతాం స్తవః || ౧ ||
శాకినీ హృదయే భాతి సా దేవీ జననీ శివా |
కాళీతి జగతి ఖ్యాతా సా దేవీ హృదయస్థితా || ౨ ||
నిరంజనా నిరాకారా నీలాంజనవికాసినీ |
ఆద్యా దేవీ కాళికాఖ్యా కేవలా నిష్కలా శివా || ౩ ||
అనంతాఽనంతరూపస్థా శాకినీ హృదయస్థితా |
తామసీ తారిణీ తారా మహోగ్రా నీలవిగ్రహా || ౪ ||
కపాలా ముండమాలాఢ్యా శవవాహనవాహనా |
లలజ్జిహ్వా సరోజాక్షీ చంద్రకోటిసమోదయా || ౫ ||
వాయ్వగ్నిభూజలాంతస్థా భవానీ శూన్యవాసినీ |
తస్మాత్ స్తోత్రమప్రకాశ్యం కృష్ణకాల్యాః కులోదయమ్ || ౬ ||
శ్రీకృష్ణభగవత్యాశ్చ నీలదేవ్యా కులార్ణవమ్ |
గోపనీయం ప్రయత్నేన సావధానోఽవధారయ || ౭ ||
మహాభైరవీ ఉవాచ |
గుంజద్గర్వగురుప్రభానఖముఖాహ్లాదైకకృష్ణాసనమ్ |
శ్రీమన్నాథకరారవిందమిలనం నేత్రాంజనం రాజతే || ౮ ||
మిథ్యామిథ్యాసురథ్యా నతిరరతిసతీ జాతివృత్తిర్గుణోక్తిః |
శ్రీదుర్గాశంభుకాళీచరణకమలకం సర్వదా భాతి సూక్ష్మమ్ || ౯ ||
కైలాసస్థాః ప్రశస్తాః స్తవనమపి తత్ప్రత్యహం సంపఠంతి |
ధ్యాత్వా ధ్యాత్వా ప్రవీరా అహమనుబహుధీః స్తౌమి కిం ధ్యాననిష్ఠః || ౧౦ ||
ప్రేచ్ఛామీహయతి ప్రియాయ కురుతే మోక్షాయ తత్త్వార్థతః |
యోగ్యశ్రీచరణాంబుజే త్రిజగతామానందపుంజే సుఖమ్ || ౧౧ ||
శ్యామే మాతః ప్రసన్నా భవ వరదకరీ కారణం దేహి నిత్యమ్ |
సత్సంగం సద్వివేకం కురు కురు కవితాపంచభూతప్రకాశమ్ || ౧౨ ||
ప్రేష్యః పారార్థచింతామణిగుణసరళః పారణః ప్రేమగానః |
మంతా మోహాదికానాం సురగణతరుణీ కోటిభిర్ధ్యేయ ఇంద్రైః || ౧౩ ||
-హాస్యేన యోగధరాధరనరవర కుంజరభుజయుగదీర్ఘపద్మమృణాలేన || ౧౪ ||
సేవనేన సుందరీ కాళీ చరణేన || ౧౫ ||
ప్రోక్తం యద్యోగగీతావచనసురచనామంగళం యోగినాద్యా |
సర్వానందోత్సవత్వం వరదసురవదాసంభవే మయ్యభావే || ౧౬ ||
ప్రాణానందకులం కులాకులకులం కాళీకులం సంకులమ్ |
నిత్యం తత్ర నియోజయ శ్రుతిగిరా శ్రీధర్మపుత్రం భవే || ౧౭ ||
యద్యేవం కురుతే పదాంబుజరజో యోగం తవానందదమ్ |
శ్రీమాన్మన్మథమన్మథః ప్రచయతి హ్యష్టాంగయోగం పరమ్ || ౧౮ ||
త్రైలోక్యం పరమేశ్వరం యది పునః పారం భవాంభోనిధేః |
శ్రీపాదాంబుజపూజనం ప్రకురుతే తే నీరదప్రోజ్జ్వలే || ౧౯ ||
భూలోకే పావనాఖ్యం పవనగమనగం శ్రీనగేంద్రాంగజాయాః |
ప్రత్యాహారం విభోర్ధ్వారుణగుణవసనం ధ్యానమేవం సమాధిమ్ || ౨౦ ||
దారే దేవగుణే విధేహి సకలం శాంతిక్రియామంగళమ్ |
తాం సర్వాం ప్రవదామి కామదహనస్తంభాయ మోహక్షయాత్ || ౨౧ ||
సర్వం యోగభవం భవే విభవగాః పశ్యన్ స్వకీయాయుషమ్ |
మూలే వేదదలోజ్జ్వలే కులపథే శ్రీకుండలీం భావయ || ౨౨ ||
లావణ్యాంబుధిరత్నకోటికిరణాహ్లాదైకమూర్తిప్రభా |
యా మూలామలపంకజే రచయతి శ్రీమాధురీ తాం భజే || ౨౩ ||
వ్యాపారం విషయాశ్రయం ప్రకురుషే న ధ్యాయసే శ్రీపదమ్ |
శ్రీకాళీం కులపండితాం గుణవతీం శాంతిం సమారాధయ || ౨౪ ||
వివేకః సంజాతో వహసి చ తయా భాతి నియతమ్ |
-మదో బ్రహ్మజ్ఞానం పరమమమలే యోగిని పరే || ౨౫ ||
వివేకోద్భూతం స్యాదమలపరమం శబ్దమపరమ్ |
ప్రభా కాళీపాదాంబుజయుగళభక్తిప్రళయదా || ౨౬ ||
పదం మాతుః కాళ్యాః ప్రథమరవికాంత్యాః సుఖమయమ్ |
విధిః శ్రీడాకిన్యాఽమరపతిధరిత్రీతి చ భజేత్ || ౨౭ ||
మహాతీర్థం సమ్యక్ పవనగగనస్థం భవకరమ్ |
సుషుమ్నాశ్రీతీర్థే మహతి గగనే పూర్ణలయవాన్ || ౨౮ ||
సుదృష్టాంగైర్యోగైః పరిభవతి శుద్ధం మమ తనుమ్ |
క్రియాదౌ సంకుర్యాద్యమనియమకార్యం యతివరః || ౨౯ ||
ధనస్తే యద్యోగీ శుచిధృతిదయాదాననిపుణః |
స్వయం సిద్ధః సద్బ్రాహ్మణకులపతాకీ సుఖమయీ || ౩౦ ||
యతీనాం సిద్ధాంతశ్రవణహృదయప్రాణవిలయః |
మహాభక్తః శ్రీహ్రీర్మతిరతికులీనస్తవ పదః || ౩౧ ||
దళం చేదహేమాక్షరం మూలదేశే |
-ఽంతరే వజ్రిణీ చిత్రిణీభాసిపద్మైః || ౩౨ ||
-త్ప్రకాశప్రకాశా బహిర్యుగ్మనాడీ |
సుధాంశూరవీ రాజసే తత్ర నిత్యమ్ || ౩౩ ||
త్వమేకా కల్యాణీ గిరిశజననీ కాళికలయా |
పరిక్షాల్య జ్ఞానైరిహ పరిజయంతి ప్రియపదమ్ || ౩౪ ||
స్వీయాంగులార్ధఘటితం ప్రశరం శనైర్యః |
దంతీక్రియాముపచరేత్ తవ భావనాయ || ౩౫ ||
యుష్మచ్ఛ్రీచరణార్పణో నవమదండస్యానిలస్తంభనాత్ |
-దానందాంబుధిమజ్జనం కులరసైర్ముక్తో భవేత్ తత్క్షణాత్ || ౩౬ ||
హితాయ జగతాం మమ ప్రియగణస్య భాగశ్రియే |
తదైవ తవ సేవకో జనని మాతరేకాక్షరమ్ || ౩౭ ||
కరుణాసాగరే మగ్నః సదా నిర్మలతేజసా |
తవాంఘ్రికోమలాంభోజం ధ్యాత్వా యోగీశ్వరో భవేత్ || ౩౮ ||
కరుణాసాగరే మగ్నో యేన యోగేన నిర్మలః |
తద్యోగం తవ పాదాబ్జం కో మూర్ఖః కః సుపండితః || ౩౯ ||
ప్రభవతి కఫనాశా నాశరంధ్రే త్రిసూత్రీ |
గలవిలగలవస్త్రం షష్టిహస్తం వహంతీ || ౪౦ ||
-ప్రమాణమితి సంతతప్రసరపంచయుగ్మాంగులమ్ |
స్వకంఠకమలోదయామమలభీతదామా భజే || ౪౧ ||
స భవతి పరవేత్తా మోహజాలం ఛినత్తి |
భ్రమితముదవధూర్నా కారసిద్ధిం దదాసి || ౪౨ ||
శివే యోగీ మాసాదపి భవతి వాయుం స్థగయతి |
నియోజ్యాదౌ ధ్యాత్వా తవ చరణపంకేరుహతలమ్ || ౪౩ ||
సుశాంతిగుణదా జయా పరమభక్తినిర్గుండికా |
దదాస్యమరసంపదం దలవియోగమూర్ధ్వోదరీమ్ || ౪౪ ||
పంచామరానామ మహౌషధిః స్థితా |
యైః పూజ్యతే సోఽహికపారమేష్ఠీ || ౪౫ ||
స్తవనమరుణవర్ణామార్కలక్ష్మ్యాః ప్రకాశమ్ |
మనుజపనసుశీలో లీలయా శంభురూపమ్ || ౪౬ ||
ప్రాతర్మధ్యాహ్నకాలే చ సాయాహ్నే చ త్రిసప్తకే |
శతం పఠిత్వా మోక్షః స్యాత్ పురశ్చర్యాఫలం లభేత్ || ౪౭ ||
ఇతి శ్రీరుద్రయామలే ఉత్తరతంత్రే మహాతంత్రోద్దీపనే సిద్ధమంత్రప్రకరణే షట్చక్రప్రకాశే భైరవీభైరవసంవాదే శాకినీకృత శ్రీ కాళీ స్తవనం నామ ద్విసప్తతితమః పటలః ||