పశుపత్యష్టకం

పశుపతిం ద్యుపతిం ధరణీపతిం
భుజగలోకపతిం చ సతీపతిమ్ |
ప్రణత భక్తజనార్తిహరం పరం
భజత రే మనుజా గిరిజాపతిమ్ || ౧ ||
న జనకో జననీ న చ సోదరో
న తనయో న చ భూరిబలం కులమ్ |
అవతి కోఽపి న కాలవశం గతం
భజత రే మనుజా గిరిజాపతిమ్ || ౨ ||
మురజడిండిమవాద్యవిలక్షణం
మధురపంచమనాదవిశారదమ్ |
ప్రమథభూతగణైరపి సేవితం
భజత రే మనుజా గిరిజాపతిమ్ || ౩ ||
శరణదం సుఖదం శరణాన్వితం
శివ శివేతి శివేతి నతం నృణామ్ |
అభయదం కరుణావరుణాలయం
భజత రే మనుజా గిరిజాపతిమ్ || ౪ ||
నరశిరోరచితం మణికుండలం
భుజగహారముదం వృషభధ్వజమ్ |
చితిరజోధవళీకృతవిగ్రహం
భజత రే మనుజా గిరిజాపతిమ్ || ౫ ||
మఖవినాశకరం శశిశేఖరం
సతతమధ్వరభాజి ఫలప్రదమ్ |
ప్రళయదగ్ధసురాసురమానవం
భజత రే మనుజా గిరిజాపతిమ్ || ౬ ||
మదమపాస్య చిరం హృది సంస్థితం
మరణజన్మజరాభయపీడితమ్ |
జగదుదీక్ష్య సమీపభయాకులం
భజత రే మనుజా గిరిజాపతిమ్ || ౭ ||
హరివిరంచిసురాధిపపూజితం
యమజనేశధనేశనమస్కృతమ్ |
త్రినయనం భూవనత్రితయాధిపం
భజత రే మనుజా గిరిజాపతిమ్ || ౮ ||
పశుపతేరిదమష్టకమద్భుతం
విరచితం పృథివీపతిసూరిణా |
పఠతి సంశృణుతే మనుజః సదా
శివపురీం వసతే లభతే ముదమ్ || ౯ ||
ఇతి శ్రీపృథివీపతిసూరివిరచితం శ్రీపశుపత్యష్టకమ్ |