అగ్ని స్తోత్రం

ఓం నమః సర్వభూతానాం సాధనాయ మహాత్మనే |
ఏకద్విపంచధిష్ణ్యాయ రాజసూయే షడాత్మనే || ౧ ||
నమః సమస్తదేవానాం వృత్తిదాయ సువర్చసే |
శుక్రరూపాయ జగతామశేషాణాం స్థితిప్రదః || ౨ ||
త్వం ముఖం సర్వదేవానాం త్వయాత్తం భగవన్ హవిః |
ప్రీణయస్యఖిలాన్ దేవాంస్త్వత్ప్రాణాః సర్వదేవతాః || ౩ ||
హుతం హవిస్త్వయ్యనల మేధత్వముపగచ్ఛతి |
తతశ్చ జలరూపేణ పరిణామముపైతి యత్ || ౪ ||
తేనాఖిలౌషధీజన్మ భవత్యనిలసారథే |
ఔషధీభిరశేషాభిః సుఖం జీవంతి జంతవః || ౫ ||
వితన్వతే నరా యజ్ఞాంస్త్వత్సృష్టాస్వోషధీషు చ |
యజ్ఞైర్దేవాస్తథా దైత్యాస్తద్వద్రక్షాంసి పావక || ౬ ||
ఆప్యాయ్యంతే చ తే యజ్ఞాస్త్వదాధారా హుతాశన |
అతః సర్వస్య యోనిస్త్వం వహ్నే సర్వమయస్తథా || ౭ ||
దేవతా దానవా యక్షా దైత్యా గంధర్వరాక్షసాః |
మానుషాః పశవో వృక్షా మృగపక్షిసరీసృపాః || ౮ ||
ఆప్యాయ్యంతే త్వయా సర్వే సంవర్ధ్యంతే చ పావక |
త్వత్త ఏవోద్భవం యాంతి త్వయ్యంతే చ తథా లయమ్ || ౯ ||
అపః సృజసి దేవత్వం త్వమత్సి పునరేవ తాః |
పచ్యమానాస్త్వయా తాశ్చ ప్రాణినాం పుష్టికారణమ్ || ౧౦ ||
దేవేషు తేజోరూపేణ కాంత్యా సిద్ధేష్వవస్థితః |
విషరూపేణ నాగేషు వాయురూపః పతత్త్రిషు || ౧౧ ||
మనుజేషు భవాన్ క్రోధో మోహః పక్షిమృగాదిషు |
అవష్టంభోఽసి తరుషు కాఠిన్యం త్వం మహీం ప్రతి || ౧౨ ||
జలే ద్రవస్త్వం భగవాన్ జవరూపీ తథాఽనిలే |
వ్యాపిత్వేన తథైవాగ్నే నభసి త్వం వ్యవస్థితః || ౧౩ ||
త్వమగ్నే సర్వభూతానామంతశ్చరసి పాలయన్ |
త్వామేకమాహుః కవయస్త్వామాహుస్త్రివిధః పునః || ౧౪ ||
త్వామష్టధా కల్పయిత్వా యజ్ఞవాహమకల్పయన్ |
త్వయా సృష్టమిదం విశ్వం వదంతి పరమర్షయః || ౧౫ ||
త్వామృతే హి జగత్సర్వం సద్యో నశ్యేద్ధుతాశన |
తుభ్యం కృత్వా ద్విజః పూజాం స్వకర్మవిహితాం గతిమ్ || ౧౬ ||
ప్రయాంతి హవ్యకవ్యాద్యైః స్వధాస్వాహాభ్యుదీరణాత్ |
పరిణామాత్మవీర్యాణి ప్రాణినామమరార్చిత || ౧౭ ||
దహంతి సర్వభూతాని తతో నిష్క్రమ్య హేతయః |
జాతవేదస్త్వయైవేదం విశ్వం సృష్టం మహాద్యుతే || ౧౮ ||
తవైవ వైదికం కర్మ సర్వభూతాత్మకం జగత్ |
నమస్తేఽనల పింగాక్ష నమస్తేఽస్తు హుతాశన || ౧౯ ||
పావకాద్య నమస్తేఽస్తు నమస్తే హవ్యవాహన |
త్వమేవ సర్వభూతానాం పావనాద్విశ్వపావనః || ౨౦ ||
త్వమేవ భుక్తపీతానాం పాచనాద్విశ్వపాచకః |
సస్యానాం పాకకర్తా త్వం పోష్టా త్వం జగతస్తథా || ౨౧ ||
త్వమేవ మేఘస్త్వం వాయుస్త్వం బీజం సస్యహేతుకమ్ |
పోషాయ సర్వభూతానాం భూతభవ్యభవో హ్యసి || ౨౨ ||
త్వం జ్యోతిః సర్వభూతేషు త్వమాదిత్యో విభావసుః |
త్వమహస్త్వం తథా రాత్రిరుభే సంధ్యే తథా భవాన్ || ౨౩ ||
త్వమహస్త్వం తథా రాత్రిరుభే సంధ్యే తథా భవాన్ |
హిరణ్యరేతాస్త్వం వహ్నే హిరణ్యోద్భవకారణమ్ || ౨౪ ||
హిరణ్యగర్భశ్చ భవాన్ హిరణ్యసదృశప్రభః |
త్వం ముహూర్తం క్షణశ్చ త్వం త్వం త్రుటిస్త్వం తథా లవః || ౨౫ ||
కలాకాష్ఠానిమేషాదిరూపేణాసి జగత్ప్రభో |
త్వమేతదఖిలం కాలః పరిణామాత్మకో భవాన్ || ౨౬ ||
యా జిహ్వా భవతః కాళీ కాలనిష్టాకరీ ప్రభో |
తయా నః పాహి పాపేభ్యః ఐహికాచ్చ మహాభయాత్ || ౨౭ ||
కరాళీ నామ యా జిహ్వా మహాప్రళయకారణమ్ |
తయా నః పాహి పాపేభ్యః ఐహికాచ్చ మహాభయాత్ || ౨౮ ||
మనోజవా చ యా జిహ్వా లఘిమాగుణలక్షణా |
తయా నః పాహి పాపేభ్యః ఐహికాచ్చ మహాభయాత్ || ౨౯ ||
కరోతి కామం భూతేభ్యో యా తే జిహ్వా సులోహితా |
తయా నః పాహి పాపేభ్యః ఐహికాచ్చ మహాభయాత్ || ౩౦ ||
సుధూమ్రవర్ణా యా జిహ్వా ప్రాణినాం రోగదాయికా |
తయా నః పాహి పాపేభ్యః ఐహికాచ్చ మహాభయాత్ || ౩౧ ||
స్ఫులింగినీ చ యా జిహ్వా యతః సకలపుద్గలాః |
తయా నః పాహి పాపేభ్యః ఐహికాచ్చ మహాభయాత్ || ౩౨ ||
యాతే విశ్వసృజా జిహ్వా ప్రాణినాం శర్మదాయినీ |
తయా నః పాహి పాపేభ్యః ఐహికాచ్చ మహాభయాత్ || ౩౩ ||
పింగాక్ష లోహితగ్రీవ కృష్ణవర్త్మ హుతాశన |
త్రాహి మాం సర్వదోషేభ్యః సంసారాదుద్ధరేహ మామ్ || ౩౪ ||
ప్రసీద వహ్నే సప్తార్చిః కృశానో హవ్యవాహన |
అగ్ని పావక శుక్రాది నామాష్టాభిరుదీరితః || ౩౫ ||
అగ్నేఽగ్రే సర్వభూతానాం సముత్పత్తిర్విభావసో |
ప్రసీద హవ్యవాహాఖ్య అభిష్టుత మయావ్యయ || ౩౬ ||
సమృద్ధిమన్ దుష్ప్రసహోఽతితీవ్రః |
-సంవర్ధకం హంత్యథవాతివీర్యమ్ || ౩౭ ||
-హృత్పుండరీకస్థమనంతమీడ్యమ్ |
హుతాశనైకో బహుధా త్వమత్ర || ౩౮ ||
నభః ససోమార్కమహర్దివాఖిలమ్ |
భవాన్విభుః పిబతి పయాంసి పావక || ౩౯ ||
మహాక్రతౌ నియమపరైర్మహర్షిభిః |
వషట్కృతాన్యపి చ హవీషి భూతయే || ౪౦ ||
వేదాంగేష్వథ సకలేషు గీయసే త్వమ్ |
వేదాంగాన్యధిగమయంతి సర్వకాలే || ౪౧ ||
-ర్భూతేశః సురపతిరర్యమా జలేశః |
సంతోష్యాఽభిమతఫలాన్యథాప్నువంతి || ౪౨ ||
సంస్పృష్టం తవ శుచి జాయతే సమస్తమ్ |
సంధ్యాయాం మునిభిరతీవ సేవ్యసే తత్ || ౪౩ ||
తత్కృత్వా త్రిదివమవాప్నువంతి లోకాః |
సద్భక్త్యా సుఖనియతాః సమూహగతిమ్ || ౪౪ ||
ప్రసీద వాయో విమలాతిదీప్తే |
ప్రసీద హవ్యాశన పాహి మాం త్వమ్ || ౪౫ ||
యత్తే వహ్నే శివం రూపం యే చ తే సప్త హేతయః |
తైః పాహి న స్తుతో దేవ పితా పుత్రమివాత్మజమ్ || ౪౬ ||
ఇతి శ్రీమార్కండేయపురాణే భౌత్యమన్వంతరే షణ్ణవతితమోఽధ్యాయే శాంతి ప్రోక్త అగ్ని స్తోత్రమ్ ||